Sjaak Boonen
Vastelaovessezoen 1955
Ein ónger ein … aan em!
Adjudant
Koos Cuijpers
Prónt in ‘t jaor’ van Sjaak, drökker van beroep en samestèller van hieël väöl vastelaovesgezètte versjaen d’r (hoeëgstwaarsjienlik) gein Kwiebusgezèt! D’r is nog eine kleine twiefel ómdet de gezèt van 1952 jaorgank drie wäordj geneumdj (nao 1899 en 1900, in 1951 waas t’r zeker gein) en die van 1956 alweer jaorgank viëf zo zeen. In 1953 waas t’r door de watersnoeëd en de naosleip daovan geine vastelaovendj.
Oet artikele bliektj det de väörbereijinge van de vastelaovend van 1955 pas ein paar waeke van te väöre wäördje gestartj. Waarsjienlik is det de raeje väör ‘t neet versjiene van ein Kwiebusgezèt.
De foto van vorst Sjaak Boonen, waarschienlik gemaak oppe daag det der wäordje oetgerope – dònderdig 17 fibberwarie 1955 – is ein van de unieke foto’s oet ‘t archief van de Kwiebusse.
Inne Kwiebusgezèt van 1956 vinje wae et bewies det Sjaak Boonen in 1956 as ieërste groeëtvorst vanne Kwiebusse is beneumdj.
Waas de schlager van 1955 ‘Kom op noe Naerse Kwiebusse’ (tekst) zoas de gezèt sjrieft of toch ‘Kwiebusse höbs se allein mer in Naer’ (geluidsfragment). Det lètse stök is anno 2025 väöl bekèndjer.
Sjaak Boonen drejt zich waarschienlik òm in zien graaf as der asnog achterkumptj er postuum det pront hae in 1955 in de gezèt ‘prins’ geneumdj waerd. Naer haet eine vorst en geine prins! Wie döks zo Sjaak angere dao-op gecorrigeerdj höbbe?
